DATENBANK

Anno 1589 den 16 junii zouch nachpar Jaspar Liblar auß dem hauß zum Hollender auff der Hoeportzn in daß hauß zum Weingart gegen der Carmeliten uber (öffnende Klammer fehlt) - daß im wegen siner hausfrawen zu stunde) wonen. Er hat noch kurtz bei der motter zum Sternen neben dem Hollender gewont und wein gezapt. So hat er sich von der motter gethain und ungeferlich ein jar lanck im Hollender wilch hauß er vom obersigler Hersbach minem neiffen und sinen miterben gemeit, wein gezapt, und auch zu sampt im hauß gegen der Carmeliten, daß zu vil nister waren dheur von preiß. Man sagt, er het sich mit siner motter und suster nit vertragen kunnen, het auch nit zu weislich gehandlet, daß sich etliche bsorgten der kram sult mit im nit bestain betsain mogen. Also steith der Hollender noch ledich und unvermeit. Off man sich drumb irre, kan ich nit wissen, off wehe eß frei.

Anno 1594 den 17 augusti hat N. Hersbach uff der Hoeportzn zum Sternen daß man Maubach hauß oder Liblarß hauß plach zu nennen begonnen zu besteigen und fort oben abzubrechen und zwa rommelfinstern drin zumachen. Diß hauß hat Caspar Liblar dem alten und Annen von Haeren eluthen zugehoirt, und alß die verstorben haben sie drei kinder verlaissen, einen munchn zum Altenberge hat nitzs an den erbguttern dan mit dem gereiden abgegudet, noch einen sohn Caspar Liblar wie der fatter genant waß bestat wonte gegen der Carmeliten kirchen uber hinder der decheneien s. Georgen mit siner frawen in dern erbe noch ein dochter Elisabeth Liblarß deß obg. N. Hersbachs ehefrawe, wilche mit irem broder getheillt hat und ire diß hauß zum Sternen in der erbtheilung angefallen waß. Disse Stern waß eirste mit zinnen gemacht oben wie daß hauß zum Stommel und zum Hollender aber etwaß nederer, hat aber kein rommelfinstern innen ob man vor vil jarn wol stedich roede wein drin verzapt hat, und die faß uffgezogen haben sulten, dweil daß hauß aber hinder dem hauß zum Stommel uff dem Buchel einnen vßganck und stall hatten, satzsten sie ire faß darin. Eitz aber hat dissen Hersbach die rommelfinstern drin gemacht und den steinen giffel uff ein ander weiß nit mit zinnen gemacht, und hat fort an den giffel von oben biß unden auß abgestrichen geweist renoueirt und in 14 tagen ungeferlich verfertigt.